Vətənimizin müstəqilliyi və torpaqlarımızın bütövlüyü uğrunda canını fəda etmiş igid şəhidlərimizin xatirəsi daim xalqımızın qəlbində yaşayır. Onların göstərdiyi qəhrəmanlıq nümunələri gənc nəsil üçün bir məktəb, bir vətənpərvərlik dərsidir.
Bu müqəddəs amal uğrunda canından keçmiş, uzun müddət itkin şəhid Elnur Qədirlinin Anım Günü münasibətilə onun ailəsi ziyarət olunmuşdur. Ziyarətdə Azərbaycan Vətən Müharibəsi Veteranları İctimai Birliyinin (AVMVİB) nümayəndələri, həmçinin AVMVİB Sabunçu rayon şöbəsinin Maştağa özəyinin üzvləri iştirak etmişdir.
Tədbir zamanı şəhidin ailəsinə dövlətimizin və xalqımızın daim onların yanında olduğu vurğulanmış, Elnur Qədirli kimi qəhrəmanların fədakarlığının heç zaman unudulmayacağı bildirilib. Ziyarət iştirakçıları şəhidin məzarı önünə gül dəstələri düzmüş, ruhuna dualar oxunmuşdur.
Şəhid Elnur Qədirlinin əziz xatirəsi isə hər zaman uca tutulacaq, nəsillər boyu hörmətlə yad ediləcəkdir.
AVMVİB-in Mətbuat xidməti
0 Yorumlar